ՄԵՐ ՏԵՍԼԱԿԱՆԸ
AMCA-ում ավանդական վեճերը գտնում են իրենց նորարարական լուծումները՝ խնայելով Ձեր ժամանակն ու ռեսուրսները։ Կրթությունն ու զարգացումը համարելով կարևորագույն ներուժ՝ Կենտրոնը շարունակելու է լինել վեճերի այլընտրանքային լուծման մշակույթը ՀՀ-ում տարածող առաջամարտիկ՝ միևնույն ժամանակ իր դիրքերն ամրապնդելով միջազգային հարթակներում։ Յուրաքանչյուր գործ կարևոր է մեզ համար և յուրաքանչյուր վեճի լուծման հետ՝ AMCA-ն ավելի ու ավելի է առաջ շարժվում՝ նպաստելով այնպիսի մթնոլորտի ստեղծմանը, որտեղ վեճերը փոխարկերպվում են հնարավորությունների, աճի և զարգացման։ Եվ հենց այս տեսլականով է AMCA-ն քայլում դեպի ապագա, որտեղ արբիտրաժային և հաշտարարական զարգացած մշակույթում վեճերը լուծվում են միայն արդար, թափանցիկ և անկողմնակալ սկզբունքներով։
ՄԵՐ ԱՌԱՔԵԼՈՒԹՅՈՒՆԸ
AMCA-ն նորարարական հարթակ է վեճերի լուծման այլընտրանքային միջոցների՝ արբիտրաժի և հաշտարարության կազմակերպման և իրականացման համար։
Կենտրոնը նպատակ ունի հանդես գալու որպես մշտապես գործող արբիտրաժային հաստատություն, որտեղ կապահովվի միջազգային և տեղական արբիտրաժային վարույթների իրականացումը՝անկախ, անկողմնակալ և արդյունավետ գործընթացների և մեխանիզմների միջոցով։ AMCA-ն առաքելություն ունի նպաստելու Հայաստանի Հանրապետությունում վեճերի լուծման այլընտրանքային մեխանիզմների զարգացմանը, տարածմանը և կիրառմանը, դրանց նկատմամբ վստահության բարձրացմանը և հանրության շրջանակներում ու գործարար համայնքում վեճերի լուծման այլընտրանքային եղանակների կիրառման խրախուսմանը։ Կենտրոնն ամեն ինչ անելու է այս ոլորտում օրենսդրության զարգացումն ու կատարելագործումը խթանելու համար, դրանով իսկ նպաստելով նաև արդարադատության մատչելիության և արդյունավետության բարձրացմանն ու դատարանների ծանրաբեռնվածության թեթևացմանը։ Կենտրոնի նպատակները հաստատուն են նաև վեճերի լուծման այլընտրանքային մեխանիզմների վերաբերյալ կրթական ծրագրերի կազմակերպման, իրականացման և ֆինանսավորման համար, որոնք նախատեսված են ինչպես հասարակական և գործարար համայնքի, այնպես էլ կրթական հաստատությունների և մասնագիտական կազմակերպություններրի համար։
AMCA-ն իր առաքելության կարևոր մեխն է համարում նաև Հայաստանի Հանրապետությունում արբիտրաժի և վեճերի լուծման այլընտրանքային այլ մեխանիզմների զարգացմանն ուղղված միջազգային համագործակցությունների հաստատումը, օտարերկրյա և միջազգային կազմակերպություններին անդամակցությունը և նշված ոլորտներում տեղացի մասնագետների ներգրավվածության բարձրացումը միջազգային ասպարեզում՝ այսպիսով Կենտրոնի գործունեությունը ներկայացնելով նաև միջազգային հարթակներում։
Հաստատուն քայլերով առաջ գնալով՝ Կենտրոնը նպատակ ունի նաև նպաստելու ՀՀ գործարար և ներդրումային միջավայրի բարելավմանը, ներդրումների և գործարար հարաբերությունների իրավական պաշտպանության մեխանիզմների արդյունավետության բարձրացմանը։
Արբիտրաժի և հաշտարարության հայաստանյան կենտրոնն անկախ մարմին է՝ չեզոքությունը, անկողմնակալությունն ու թափանցիկությունն ընդունելով որպես անկյունաքարային սկզբունքներ:
ԿԵՆՏՐՈՆԻ ՍՏԵՂԾՄԱՆ ՊԱՏՄՈՒԹՅՈՒՆԸ
Արբիտրաժի և հաշտարարության հայաստանյան կենտրոնի պատմությունը սկիզբ է առնում Հայաստանում դատաիրավական բարեփոխումների 2019-2023 թվականների ռազմավարությունից, որով նախատեսվել էր Արբիտրաժի և հաշտարարության կենտրոնի ստեղծում՝ ապահովելով տեղական և միջազգային վեճերի լուծումը։ Արբիտրաժի և հաշտարարության ինստիտուցիոնալ կենտրոն ստեղծելու կարևորությունը ընդգծված է նաև ՀՀ կառավարության 2021-2026 թվականների ռազմավարության մեջ։ Ուստի հենց այս ռազմավարական ուղենիշներն էլ ազդարարեցին Հայաստանի հանձնառությունը՝ խթանելու վեճերի լուծման արդյունավետ, արդար և ժամանակակից մեխանիզմների ներդրումը։
AMCA-ի հիմնադրման ընթացքում մասնագիտական խորհրդատվություն և օգնություն ստանալու նպատակով 2021 թվականին ստեղծվել էր Խորհրդատվական հանձնաժողով, որը կազմված էր տեղական և միջազգային հայտնի և ականավոր փորձագետներից:
2023 թվականի մայիսին ստորագրվեց Արբիտրաժի և հաշտարարության հայաստանյան կենտրոնի հիմնադրումն ազդարարող որոշումը, որը ստորագրվեց «Օրենսդրության զարգացման կենտրոն» հիմնադրամի, Հայկական բարեգործական ընդհանուր միության և Հայ իրավաբանական միության հիմնադիրների ներկայացուցիչների կողմից։
Հատկանշական է, որ տարբեր հեղինակավոր միջազգային գործընկերներ աջակցել և շարունակում են աջակցել Կենտրոնին` տրամադրելով տեխնիկական աջակցություն և իրենց ներդրումն ունենալով կազմակերպչական և նյութատեխնիկական հարցերում: Կենտրոնի գործունեության համար ֆինանսական աջակցությունը տրամադրվում է ԵՄ բյուջետային աջակցությամբ։
Կարևոր փաստաթղեր
Արբիտրաժի և հաշտարարության հայաստանյան կենտրոնը կարևորելով գործունեության թափանցիկությունը ներկայացնում է կենտրոնի հիմքում ընկած ներքին փաստաթղթերն ու կանոնադրությունը։ Այս փաստաթղթերը հեշտությամբ հասանելի դարձնելն օգնում է շահագրգիռ կողմերին հասկանալ, թե ինչպես է գործում կազմակերպությունը և ինչ չափանիշներին է հետևում: Խթանում է թափանցիկությունը, համապատասխանությունը, հաշվետվողականությունը
և վստահությունը:
Հայկական բարեգործական ընդհանուր միություն
Հայկական բարեգործական ընդհանուր միություն
Հայ իրավաբանական միություն
Հայ իրավաբանական միություն
Օրենսդրության զարգացման կենտրոն
Օրենսդրության զարգացման կենտրոն
Ասիական զարգացման բանկ
Ասիական զարգացման բանկ
Եվրոպական Միություն
Եվրոպական Միություն