Կարևոր է խթանել հաշտարարության ինստիտուտը, քանի որ այն վեճերի լուծման այլընտրանքային մեթոդներից մեկն է աշխարհում: Հունվարի 21-ին Հաշտարարության միջազգային օրվա կապակցությամբ Հայաստանի արբիտրաժային և հաշտարարության կենտրոնը կազմակերպել էր միջոցառում, որին մասնակցում էին արտոնագրված հաշտարարներ, Արդարադատության նախարարության ներկայացուցիչներ, դատավորներ, իրավաբաններ և փաստաբաններ։ AMCA-ի տնօրեն Տաթևիկ Մատինյանը ողջունեց հյուրերին՝ նախանշելով հաշտարարության ինստիտուտի զարգացման ուղիները և անդրադարձավ առաջիկա անելիքներին։ Նա խոսեց նաև հաշտարարների մասնագիտական օրվա մասին՝ ընդգծելով Հայաստանում հաշտարարության խթանման կարևորությունը։ Ելույթ ունեցավ նաև AMCA-ի հոգաբարձուների խորհրդի նախագահ, Օրենսդրության զարգացման կենտրոնի ղեկավար Տիգրան Դադունցը։ Կարևորելով մեդիացիայի ինստիտուցիոնալ զարգացումը` նա նշեց, որ նախորդ որակավորման քննություններին մասնակցել են 85 դիմորդներ (որն աննախադեպ արդյունք էր), որոնցից 20-ը հնարավորություն են ստացել մասնակցելու դասընթացին, 6-ը ակտիվ միջնորդներ են, իսկ 14-ը միացել են միջնորդական համայնքին:

Շնորհավորանքի խոսքով հանդես եկավ նաև ՀՀ վճռաբեկ դատարանի քաղաքացիական պալատի դատավոր Արսեն Մկրտչյանը, ով խոսեց ինստիտուտի զարգացման նախադրյալների մասին և ընդգծեց Հայաստանում հաշտարարության մշակույթի խթանման կարևորությունը։ AMCA-ի փոխտնօրեն Լիլիթ Պետրոսյանը և AMCA-ի արտոնագրված հաշտարար, միջնորդության գործերի կառավարիչ Իգոր Միրզախանյանը ներկայացրեցին Կենտրոնի հաշտարարության կանոնները, աշխատանքային ուղղությունները և որդեգրած քաղաքականությունը հաշտարարության ոլորտում:

Հաշտարարության շնորհիվ հնարավոր է ոչ միայն լուծել առկա վեճերը, այլև կանխել դեռ չծագվածները։ Այն արդյունավետ գործիք է, որը թույլ է տալիս խթանել բիզնեսի զարգացումը, ներդրումային դաշտը և նվազեցնել բիզնեսի ռիսկերը։ Հաշտարարության մասին առաջին օրենքը, որն ընդունվել է Եվրոպայի խորհրդի կողմից 1998 թվականի հունվարի 21-ին, նախաձեռնեց հաշտարարության ինստիտուտների զարգացումը Եվրոպայում: Հաշտարարության օրը Հայաստանում այս տարի նշվեց առաջին անգամ։